Həcc ziyarətinə gedən uşaqlar üçün qiymətlər necədir?
27-01-2025, 15:24
Həcc ziyarətinə getmək istəyənlər üçün sənəq qəbulu başlayıb.
Sənədlərin qəbulu yanvarın 21-dən etibarən iş günləri ərzində saat 10:00-dan 16:00-a kimi Qafqaz Müsəlmanları İdarəsinin (QMİ) Bakı şəhəri, Mirzə Fətəli küçəsi 7 ünvanında yerləşən inzibati binasında aparılır. QMİ 2025-ci ildə Həcc ziyarətinə getmək istəyən vətəndaşlar üçün qiymətləri də müəyyən edib.
Bir nəfər üçün ziyarət paketinin qiyməti 5950 ABŞ dollarıdır.
Qeyd edək ki, ötən il ziyarət paketinin qiyməti 5850 dollar olub. Yəni, qiymətdə 100 dollar artım var.
QMİ Xarici Əlaqələr şöbəsinin müdiri, Həcc elektron sistem rəhbəri Vüsal Cahangiri TNS-ə bildirib ki, qiymətlərin artımına Səudiyyə Ərəbistanında bütün xidmətlərin bahalaşması təsir edir: “Ziyarət qiyməti daha ucuz olan ölkələr də ola bilər. Amma bizim zəvvarlar keyfiyyətli xidmət istədikləri üçün qiymətlərdə artımın olması qaçılmazdır”.
Ziyarətə gedəcək uşaqların xərclərinə gəlincə, V.Cahangiri bildirib ki, qiymətlərdə heç bir fərq yoxdur: “Uşaqlar üçün də Həcc ziyarətinin qiyməti 5950 dolllar təşkil edir. Onlar bir yer tutacaqları üçün qiymətlər eyni müəyyənləşdirilir”.
Qeyd edək ki, Həcc ziyarətinə bu il ölkədən neçə nəfərin gedəcəyi hələ açıqlanmayıb.
Geri qayıt