Son aylar prezident İlham Əliyev ictimaiyyət tərəfindən də uğurlu hesab edilən kadr siyasəti həyata keçirir. Prezident əsasən dövlət idərəçiliyində xaricdə təhsil almış, yüksək intellektli gənclərə üstünlük verir. Dövlət idarəçiliyində uzun zamandır təmsil edilən və artıq kifayət qədər yaşları olan kadrlar isə istefa ərizəsi yazaraq, təqaüdə çıxırlar.
Yuxarıda da qeyd etdiyimiz kimi, bu, müstəqil ekspertlər və ümumən ictimaiyyət tərəfindən yüksək addımlar kimi xarakterizə edilir. Bəs Azərbaycan müxalifətində durum necədir? Müxalifət funksionerləri gəncləşirmi?
Uzun illərdir ki, Azərbaycanın müxalifət partiyalarında demək olar ki, sədrlər və onların müavinləri dəyişmirlər. Müxalifət partiyalarının funksionerlərinə nəzər salsaq, onların əksəriyyətinin orta və yaşlı nəslin nümayəndəsi olduğunu görərik. Lakin partiya funksionerləri ilə söhbətimizdə onlar görünənin əksini söylədilər.
Belə ki, KXCP sədrinin müavini Xəzər Teyyublu “Yeni Müsavat”a bildirdi ki, gənclərin təcrübəsindən istifadə etmək vacibdir: “Müxalifətdə mütləq gəncləşmə vacibdir. Çünki gənclər yeni düşüncə deməkdir. Ancaq Azərbaycan hakimiyyətinin siyasi partiyalara olan təzyiqi ölkədə siyasəti bir qədər arxa plana keçirdiyi üçün Azərbaycanın müxalifət təşkilatlarında da gəncləşmə işi çox güclü getmir. Ancaq şəxsən mən gənclərə böyük üstünlük vermişəm. Gənclərlə işləməyi də çox sevirəm. İstərdim ki, Azərbaycanın siyasi müxalifətində gənclərin rolu daha da artsın və gənclərə meydan verilsin. Çünki Azərbaycanın gələcəyi gənclərdən ibarətdir”.
AG Partiyanın sədri Tural Abbaslı düşünür ki, gənclik və qocalıq məsələsini bioloji yaşla bağlamağın tərəfdarı deyil: “Məncə, bu, daha çox düşüncə tərzi, həyata baxış və yaxud da müasir dünyanın çağırışlarını qəbul edib-etməmək məsələsi ilə bağlıdır. Yəni burada başların içərisindəki yenilik və köhnəlikdən söhbət gedə bilər. Odur ki, hakimiyyətin bu istiqamətdə atdığı addımların nəticəsini hələ gözləmək lazımdır. Təbii ki, müxalifətdə də gəncləşdirmə mütləqdir. Bu məsələdə hələ meydan həyatından bəri siyasi arenada olan bəzi müxalif liderlər də hansısa töhfələr verməlidirlər. Təəssüf ki, hələ belə bir addım atmırlar. Çünki düşünürlər ki, onlar hələ də özlərinin siyasi bacarıqlarını tam şəkildə ortaya qoya bilməyiblər. O baxımdan yeni kadrların ortaya çıxmasında maraqlı deyillər. Onlar bu prosesə nəinki dəstək vermirlər, hətta baxırsan ki, bəziləri altdan-altdan öz təşkilatçılıq qabiliyyətinə görə önə çıxan gənc siyasi müxalifətçiləri bu və ya digər formada gözdən salmaq, qeyri-ciddi duruma gətirmək, ləkələmək xətti də tuturlar. Gənclər özləri də çalışmalı, cığır açmalı, önə çıxmalıdırlar. Təəssüf ki, müxalifət o qədər cəlbedici deyil. Hakimiyyətdə gənc kadrların olması təbiidir. Çünki orada vəzifə, üstünlüklər var və buna görə də gənclər maraqlıdır. Müxalifətdə isə işdən qovulmalar, təhsildən kənarlaşdırılma, həbs edilmələr olur. Belə bir mühitə isə axın edən gənclərin sayı azdır. Ona görə də müxalifət bu məsələdə yubanır. Bizim partiyanın 80 faizdən çoxu gənclərdən ibarətdir və düşünürəm ki, partiya olaraq bu boşluğu doldurmağa çalışacağıq”.
Ümid Partiyasının sədr müavini Tamilla Qulami bildirib ki, partiya olaraq biz də zamanın tələbindən geri qalmırıq: "Təhsilli gənclərə, savadlı kadrlara ehtiyac böyükdür. Biz də gələcəyin iqtidar partiyası olmağı qarşımıza məqsəd kimi qoymuşuq. Ona görə də bu kimi məqamlara da üstünlük veririk. Lakin düşünürəm ki, sistem düzgün qurularsa, idarəçilik də normal olar. Ona görə də biz gəncləşmə siyasətini aparmaqla yanaşı, sistemə də diqqət edirik. Təbii ki, 70-dən çox yaşı olan şəxslər öz işini yüksək səviyyədə yerinə yetirə bilməz. Gənclərin Azərbaycanın idarə edilməsində inkişafı maksimum təmin olunmalıdır. Dövlət quruculuğunda nə qədər çox gənc iştirak edərsə, bu, gələcəyimiz üçün də yaxşı olar. Bunun üçün dediyimiz sistemi də düzgün qurmaq gərəkdir".
ADP sədrinin müavini Həsrət Rüstəmov hesab edir ki, gəncləşdirmə ideyalarla bağlıdır: “Müxalifətin ideyaları onsuz da hər zaman gənc ideya olub. Yəni demokratiya ən sonuncu ideyadır. Biz də hər zaman demokratiyanın tərəfində olmuşuq. Partiyamızın idarə heyətində isə yaşlı nəsil çox azdır. Əsasən gənclər üstünlük təşkil edir. Bütün bunları nəzərə alarsaq deyə bilərəm ki, bizim gəncləşdirməyə xüsusi bir ehtiyacımız yoxdur”.
